(مقارنة )الشاعر سالم الحمداني ·

(مقارنة )

انت مين وآنه مين
انت من عرج الخباثه
النبت فوگ الماي طين 
وآنه جذري
انت تدري
عاش من صوت الضمير
صوت رب العالمين
انت من تترس شليلك
هاي حسبالك گضت
مشت ما ترجع قضيه
وصحت حتى اعله ربعك
سالمين سالمين
خايب شويه گلبهه القضيه
اصفن وداور حياتك
وشلع گفاك واقره زين
انت من تفحص سلوكك
تلگه بي مليون عاهه
اتزاوجن واولاد عدهن
كالشياطين
خل اذكرك
آنه من اگلب جدم
ينطبع وجه الوفاء
ويرسّم وجه الحنين
وتنگلب بيهه فرحتي
اجناح طير
وللاخوّه امسييرين
اتعلمت اغسل دمعتي
حتى اشوف الدمع
ما يكذب عليه
وحتى اقره عيون غيري
وحتى اعرف المستحي
من الكاوليه
وعلمت خزرات ربعي
من يطيحن
اعتبرهن سرسريه
وهاي هيه
المجتمع في ذيل عمري
الموجه عنده اتغيّرت
والجاذبيه
وهاي هيه
اشماتسوي الدنيه بيه
آنه اظل مصراع يفتر
ما تچتف اللو ايديه
آنه احساسي اورقتي
قلمي يبحر في هواهه
ما تدنسهه الرديه
تكبر ويكبر صدرهه
وينفتح نهر المحبه
تلعب وترجع صبيه
وهاي هيه
احنه في عهد الشوارب
وهذا ذيب واخو خيته
وذاك زلمه وخوش زلمه
احنه في ساحة نزال
اليردّه المستحه
ولا بيه رحمه
الوعي والله خطيه
عزّل ولابس عباته
حتى لا تكفيري يشوفه
ويعتبر ويّاه خصمه
وخصمي من يهد عليه
بيدي اگطع نفسه كلّه
ولا اخلّي يشمله نسمه
آنه العراق
فكك اسمي وبيدك افحص
تلگه بي كلشي وكلاشي
الغيره طابو امفصله
بس اعله اسمه
آنه العراق
سالت ادموعه نهر
دجله وفرات
ابخت من صار
عكازة قتل
موت يزرع
من اجل يستاف دمّه
اتكلّي اصبر تنتهي
وينگص جذرهه
لشوكت اصبر
والصبر صيّاد
غافلني اعله سهمه

الدهر شيريد ناصب شلمنّي
وحس شريان گلبي شلمنّي
ابدماه اعضاي كلهه شلمنّي
اجيت ازحوف مامش حيل بيه

سياسي اللي ثبرني
الما يعرف اشلون
يندار اعله طوله
والضمير اللي يحمله
يشرّع ابوابه ابسهوله
والطامّه الكبرى
اذا الجلسات صارت
الصفر يحسب حموله
ومن تمر
تتراكم الايام زحمه
وماكو رحمه
من يبيع
عيون شعبه للحچوله
وشحجوله
انأسس احنه
كل ميادين القتال
گص رؤوس
الموت تفصال اعله طوله
انسوّد اوجوه التواريخ النزيهه
حتى ما ترجع اصوله
هاك اخذ شكبان
اموال الخزينه
اتروح فدوه الكل دواوين الحموله
هز چتف ورداف
ونصر من اجوك
وهاي هيه
احنه من الله النصر مكتوب
ما غيرنه حوله