كُنَّا عَشرة بِنَّا عِشرة.الشاعر سامح هريدى

كُنَّا عَشرة بِنَّا عِشرة.
وحلم قابل للحقيقة.
النوايا شِبه خالصه
والقلوب صافية وبريئة..
كنا عشرة والمواقف 
سقطت منا الكتير
والفاضل منا ذكري
نفتكرها بكل خير
يعني واحد جنب واحد
بس بيساووا الكتير..
كنا عشرة بقينا تسعه
أصله راح على رزقه يسعى
دنيا خنقة بس واسعه
والبراح راحة ضمير..
تسعى بنهم راح تخاف
أصلهم على قلب واحد
تسعه منهم حد خاف
يعني فجأة نقصه واحد..
والعدد أصبح تمانية
والحياة أكبر معلم
منها ناخد دروس
والمناصب حاجة حلوة
بس بتغير نفوس
ربنا كرمه بوظيفة
دنيته صبحت لطيفة
راح وغاب من غير متابعة
ف العدد صفصف ل سابعة..
سابعة زي السبع كنا
كلنا دايسين همومنا
وسط غفلة نيمنا ..قومنا
ملقيناش اتنين كمان
قولنا ده طبع الزمان
حد بعنا..وحد خان
واللى فضله كف إيد..
كف حاضن كف صاحبه
عمره عدى وهو صاحبه
فى الآلام دايما معاه
فى الجراح أصلا مصاحبه
خمسه شالوا الحلم فكرة
كملوا امبارح ببكرة
سطروا أجمل رواية
سابوا بنا أحلى ذكري
خمسه همه بس لمه
مليانين بالعزم همه
عندهم دايما طموح
يوصلوا على أعلي قمة..