رسالة إلى أمي من حلوان إلى الشرقية الشاعر عيسى عبدالرؤوف

** ؤسالة إلى أمى الحبيبة **

مانيش ف الغربة يمايا
هي حلوان إسمها غربة
مهو إنتي ف قلبي جوايا
وواخداني منك ظروف صعبة

معلش إتحملي بعدي
بيني وبينك دي فركة كعب
وأهي أيام وبتعدي
مشوار العيشة قاسي وصعب

أوعاكي ف يوم تزعلي مني
ياغاليه وتدمع عيونك
والله ياأمي غصب عني
إياكي تخيب فيا ظنونك

وتقولي ولدك بقى قاسي
وناسي يوم ييجي يزورك
إنتى روحي وأنفاسي
أنا أعمى وماشى بنورك

صحيح بمواصله أوصلك
مهو بيني وبينك بلبيس
وف ساعة تلاقيني مداد ظلك
مانيش والله ياأمي خسيس

وحشاني صحيح تاني اللمة
وقرية جميلة من بلادي
لكن أولادي ف ثانوية عامة
ودا ياأمي ماهوش عادي

إدعيلي ياأمي أشوف خيرهم
دا مصيري ياأمي فى رضاكي
هما سندي وماليش غيرهم
وسر نجاحهم فى دعاكي

أرجوكي ياأمي سامحيني
وفى كل صلاتك إدعيلي
أنا ياأمي ماليش غيرك
إنتي حياتي ونور عيني

=====================