كرامتي ممكن الغيها الشاعر جبريل السيد

ومين قالك عشان حبيت 
كرامتي ممكن الغيها 
ضحكوا عليكي بالتاكيد 
دا انا عايش يا دوب بيها 
دي اخر حاجه من ورثي 
خلاص مفاضلش شئ تاني
ومطرح مركبي ما ترسي
هقول ده هوه عنواني
وارض الله مدام واسعه
اكيد ليا مكان فيها
ومين قالك مدام حبيت
كرامتي ممكن الغيها
انا سواح بلاد الله
ف كل دقيقه انا ف حاله
بلاد الله لخلق الله
وروحي فيها رحاله
تروح ايام وتيجي ايام
وياما ايام بعديها
وعمري ما شفت ارض عمار
تهد ايدين بتبنيها
دا انا العاشق
انا العاشق
لحد الصبح بسهرلك
وكل ما قلبي يغزل شال
يكون الشال علي ادك
انا منك
انا قلبك
وزرعه عمر محتاجه
تداديها وترويها
فليه عيزاني ابيع نفسي
وعزه نفسي اداريها
كتير انا بنجرح منك
وياما انداس علي قلبي
وعمري ما اشتكيت منك
عشان ع العز متربي
وعارف قيمه العشره
وعارف اني من غيرك
مليش حاضر ولا بكره
وعارف اني من غيرك
بئيت ماضي وبئيت ذكري
لكن بردو مهوش مقبول
كرامتي فيكي الغيها
خديني صديق
وخليني اكون سندك
وخليني اكونلك طوع
وخليني اكون ضهرك
وخليني اكون فارس
وعمري يكون قصاد مهرك
وخليني اكون انسان
ما انا انسان
فخليني وانا راضي
حياتي عشانك افنيها
مهوش منطق ولا مقبول
كرامتي فيكي الغيها