ولا يوم مع دول #شاعر_الغلابة

لو عايز من غير ما تدوخ..
حاول تتعلم مسح الجوخ..
حاول توفيق الأوضاع..
حاول تنصاع..
لأوامر كل رديف السوق..
كن حد شمال
قرب من كل الاندال
وصحاب السوء ..
خليك على وضع السكران
يعني أوعى تفوق..
خليك متسلسل زي خروف
هتكون معلوف
هتكون معروف
هتكون وهتبقى سعادة البية ..
جوكر بيقش
أو واد بيلم
والكل هيبقى بأفكارك دايما مهتم..
طب قول أوكية..
طول م أنت مطيع
طول م أنت وديع
بتنفذ من غير ما تعارض
أو حتي تغير في المواضيع
هيقولوا عليك
ان أنت بديع..
وف لحظة.. ما تفكر مره
وتحاول تعلن عن رأيك
في ثواني تضيع
وهتبقى وضيع
وهتبقى المنبوذ من كله
وصفك ..دلدول
ولا منك عايش بكرامتك
ولا منهم أصلا هتنول
يعني انت رقصت على السلم
لا بقيت مع دول
ولا يوم مع دول
#شاعر_الغلابة