#سامح_هريدي #الليل_برئ
لكنه شاف
البرد مش قد الغطىَ..
فَحن قلبه
ع اللى شايلين همهم.
وخاف .لا ينهش لحمهم..
فَبعت لهم..
الشمس ملفوفه فى لحاف
علشان تطمن قلبهم..
مستنظرين يرسىِ العطىَ
علي حلمهم
ويُرادُ لليل الجِميل
الليل طويل أوي عندهم
أطول من السَبع العِجاف
بيغمسوها بصبر حاف
الحمل منقوش ع الكتاف
والوش مطبوع بالشقى
والإيد شوارع
تمشي فيها الذكريات
والذكريات
مليانه دايما بالوجع
الليل ساعات بيكون جدع
وسنين كتير
بيكون قليل الاصل
فى بيوت الفقير..
الحلم مِتعَرش حَصير
فا المطره تنزل تقتله
الحزن مين حايبدله
والجرح إيه حا دبله
والهم مين يستحمله
غير القلوب الدايبه فيه
الليل برئ
من كل تهمه إتوجهت أصلا إليه
فا بلاش نلوم
أو يوم نجيب العيب عليه..
وتعالوا نسأل نفسنا؟
هو احنا ليه علي بعضنا
قلوبنا أقوي من الحجر..؟
القسوة ليه داء إنتشر..؟
الرحمة ماتت والضمير
مبقاش بينئح ع البشر
الليل كفيف
لكن حاسيس
أما احنا بنشوف إنما
عمي البصيرة والبصر
#شاعر_الغلابة
#سامح_هريدي
#الليل_برئ
تعليقات
إرسال تعليق