قصيدة ( دنيا الوجع ) بقلم / نعمات عماد

قصيدة ( دنيا الوجع ) 

بتتألم ومن غير صوت 
بتتألم وراضي سكوت
كأن القلب عايش لحظه
ما تتسمى غير بالموت 
جراحنا اكفان / ملفوفه 
بتداري ومكسوفه 
ما هيا علينا ملهوفه 
دي دنيا بتقتل الجبروت

بتنسينا احلى ما فينا
وبتدوقنا طعم المر
وبتعيشنا طول العمر
بين الآهه والآهه 
وجع دايم ومش بيمر

بنلعن يوم ما صدقنا
ان الدنيا دي ساعه
وان العمر مش ساعه 
يجوز نبكي على حالنا
لكن هنقدم الطاعه 

دنيا غريبه صبابه
بتعيشنا في غابه مع ديابه
لا في قوانين بتحكمها 
ولا في عدل ينصفها
ولا في رحمه تحييها
صحيح عايشين ومش عايشين
لكن عارفين نموت فيها

مفيش ولا حد بيساند 
وحتى الفرحه بتعاند
في وقت الشده مين يبقى
مفيش غير رب بيساعد

يا وجع عايش في قلب مريض
كفايه علينا مرض مزمن 
بندعي الرب انه يروح 
لحد الفجر ما بيدن

قدر مكتوب . واحنا المؤمنين بالله
بعدله وقدره وقضائه / نقول الله
داوينا برحمتك بينا . بعدلك برضه تحمينا
فنرفع للسما ادينا. يا الله / يا الله

بقلم / نعمات عماد