#ضحكة_رضا #شاعر_الغلابة

ضحكة رضا
وقلب مليان بالمحبه للجميع
الطيبة منه بتتصرف 
على كل حد بيعرفه..
منبع رجولة وأي حد يشرفه ..
انه بيتعامل معاه..
الدنيا كانت تحت منهُ
أكبر كتير من صغر سنهُ
مكنش شئ يفرق معاه
ولا شئ يهمهُ..
كان قلب أمه ...ونبضها
عايش بيخدم صبرها
كان فرحها
ونس الليالي الصعبة
والقلب الحزين
بركان حنين
كان إمتداد طيب لأبوه
يسند أخوه
ويشرف أخته ف عرسها
كل الصفات إتجمعت
وإتشكلت بيهم جدع
كان صبره أقوي من الوجع
لا عمره كَلّ ولا أشتكىَ
ولا عينه خضعت للبكىَ
كان رَامي حملهُ على الكريم
وكان كريم مع أي حد
راجل بجد
دايماً يسد
وقت الشدايد كان جبل
يتحمل الكل بسماح
كان معني أصلي للبراح
دايما متاح..
جنب اللى يحتاجهُ يلاقيه
لو حد باعهُ يشتريه
ويخاف عليه
ويموت عشان يفدىِ إللى منهُ
#سيد عفيف النفس
شبعان م الحياة
انسان قنوع
كان أغني من كل البتوع
ضحكة رضا
كان بيها عايش وسطنا
ضحكة رضا
ودعنا بيها ف جرحنا
عمره ما زعل منه حد
وف يوم وداعه
زعل عليه كل اللى قابله..
يارب طالب رحمتك
وانك بعفوك وبرضاك
دايماً تقابله..
انك تونس وحدته
وتفيض بكرمك ع الضعيف
وتقوي قلبه